Kamati ya Kudumu ya Bunge ya huduma ya Jamii imetembelea Makao Makuu ya Bohari ya Dawa Keko

Kamati ya Kudumu ya Bunge ya huduma ya Jamii imetembelea Makao Makuu ya Bohari ya Dawa Keko na kuipongeza kwa utendaji wake kazi pamoja na mazingira magumu yanayoikabili.Mwenyekiti wa Kamati hiyo Mhe. Peter Serukamba amesema Kamati yake itasimamiana kuyafanyia kazi masuala makubwa manne ambayo ni pamoja na bajeti finyu ya dawa, ulipwaji wa deni la serikali, mfumo wa uwajibikaji kati ya TAMISEMI na Wizara ya Afya ambao unasababisha utekelezaji na usimamizi wa masuala ya Afya kutokuwa na mtiririko kutoka juu kwenda chini. Jambo la nne ni kuhakikisha utekelezaji wa kuongeza uzalishaji dawa ndani ya nchi kupitia sekta binafsi (PPP).

Kamati ya Kudumu ya Bunge ya masuala ya UKIMWI na dawa za kulevya yatembelea Makao Makuu ya Bohari ya dawa (MSD)

Wajumbe wa Kamati ya Kudumu ya Bunge ya masuala ya UKIMWI na dawa za kulevya wametembelea Makao Makuu ya Bohari ya dawa (MSD), Keko jijini Dar es Salaam. Katika ziara yao kamati imeishauri serikali kutenga bajeti ya dawa na vifaa tiba kulingana na mahitaji.

Akitoa ufafanuzi kuhusu asilimia 80% ya dawa kuagizwa nje ya nchi, Mkurugenzi Mkuu wa MSD Bw. Laurean Bwanakunu amesema bado hakuna viwanda vya ndani vya kutengeneza dawa ,na vichache vilivyopo havina uwezo wa kukidhi mahitaji ya MSD.

MSD yapokea vifaa tiba vya bil 10 kutoka kwa kampuni za Coca-Cola, Pepsi na Azam

Serikali imepokea msaada wa vifaa tiba vyenye thamani ya Sh bilioni 10 kutoka kwa umoja wa kampuni za utengenezaji wa vinywaji baridi nchini. Akipokea msaada huo kwa niaba ya Serikali Waziri Mkuu wa Jamhuri ya Muungano wa Tanzania Mhe. Kassim Majaliwa alisema kuwa msaada huo ni mkubwa na wa aina yake na umekuja wakati muafaka wakati serikali ipo katika jitihada za kuboresha huduma za afya nchini.

Pia Majaliwa alisema anaimani kubwa na utendaji wa Bohari ya Dawa (MSD) chini ya uongozi wa Mkurugenzi Mkuu wake Bw. Laurean Bwanakunu, hivyo vifaa hivyo vitasambazwa kwa wakati uliopangwa, sehemu husika na kwa umakini mkubwa.

Majaliwa alisema kitendo cha kampuni hizo kutoa msaada huo mkubwa, ambao ameupokea ikiwa ni kontena 20 za futi 40 zenye makasha 1,500 ya vifaa vipya na vifaa mbalimbali zaidi ya 300 vikiwemo vitanda 80 na magodoro yake, unastahili kupongezwa na kila Mtanzania na kuungwa mkono na wadau wengine katika kunusuru afya za watanzania.

Mbali na msaada huo, lakini kampuni hizo kupitia Kampuni ya Coca-Cola italeta wataalamu kutoa mafunzo kwa watumiaji wa vifaa hivyo.

Waziri Mkuu Mhe.Kassim M. Majaliwa amezindua duka la dawa la Halmashauri ya Chato, mkoani Geita ambalo linaendeshwa na MSD.

Kwa mujibu wa Mkurugenzi Mkuu wa MSD, Bw. Lauren Bwanakunu duka hilo la Chato ni mfano kwa Wilaya nyingine na mikoa, ambapo tayari Ofisi ya Rais Tawala za Mikoa na Serikali Mitaa (Tamisemi) mikoa na Wilaya kuanzisha maduka hayo,na kisha msd itatoa ushauri wa kitaalam.

Bwanakunu ameeleza kuwa kwa kuanza,duka la dawa la Halmashauri ya Chato linaendeshwa na msd,lakini baada ya muda watalikabidhi kwa Halmashauri ya Chato

MSD yakabidhi vifaa vya mil 80.4 Hospitali ya Muhimbili

Bohari ya Dawa (MSD) hii leo tarehe 15/2/2016 imemkabidhi Waziri wa Afya, Maendeleo ya Jamii, Jinsia, Wazee na Watoto vifaa tiba vyenye thamani ya shilingi Mil. 80.4 kwa ajili ya wodi mpya ya wazazi iliyopo Muhimbili, vifaa hivyo ni pamoja na magodoro 120, mashuka 480 na vitanda 10 kwa ajili ya watoto wanaozaliwa kabla ya wakati (Njiti). Vifaa hivi vimenunuliwa na Ofisi ya Rais Ikulu kwa ajili ya kuongeza idadi ya vitanda kukidhi mahitaji ya akina mama wanaojifungua na kulazwa katika wodi hiyo.

Akikabidhi vifaa hivyo Mkurugenzi Mkuu wa MSD Bw. Laurean R. Bwanakunu amesema MSD imejitahidi kutekeleza kwa wakati agizo la Rais la kupeleka vifaa hivi kwenye Hospitali ya Muhimbili (Wodi mpya) katika jengo lililokuwa Kitengo cha Afya ya Uzazi na Mtoto.

Tayari MSD imeshavifikisha vifaa vyote Muhimbili vikisubiri kuingizwa katika jengo hilo.

More Articles...